Ons boek 1 Januarie 2011 by Tweerivieren in, ‘n eerste vir ons op 1 Januarie. Die eerste aand waai die wind al die kole uit die braaibak toe die vleis so te sê gaar is en toe is die reën daar. Ons vertrek die volgende oggend Urikaruus toe, die Auab is droog. Horingdroog.
Die eerste middag by Urikaruus steek die wolke weer op en dit begin weer reën, ‘n patroon wat vir die volgende week voort duur. Gedeeltes van die Auab begin vloei, lê kant aan wal.
Ons vertrek Nossob toe, oor die duinepad. Dis nou ‘n week later en die rooi duine is oortrek met geel duwweltiesblommetjies, ‘n gesig wat mens nooit sal vergeet nie.
